突然之間, 諗返起一個我幾乎遺忘既朋友

唔.... 係一個足足10年前既朋友

我好想搵返佢

但個電話號碼, email都已經唔通

facebook, yahoo又搵唔到

就連而家佢係邊個國家我都唔知

咁我仲可以點?

可能因為通訊科技太發達

有時以為"朋友"就係眼下msn個人名表

需要既時候, 按兩按就可以聯絡上

錯覺地以為, 自己同好多朋友都仲係維繫住

但原來太少往來, 朋友真係會逐漸消失

可能是一個人住得寂寞既關係吧

最近, 我想起好多好舊好舊既事

好懷念呢, 那些無憂無慮既日子....

我記得, 我曾經好鍾意<<eyes on me>>

首歌真係好動人, 個動畫更加係百看不厭

仲有就係, 我識得一個女仔, 同女主角長得一模一樣的~!

但連她的名我都已經想唔起喇....

個個時候, 一直都好想玩Final Fantasy8

我同自己講, 一考完試就可以玩的了

不過始終一直都無玩過

其實我好想, 可以追得返, "及時行樂"一下

天氣轉凍左好多

我簡陋的工作屋入面惟一既裝飾品

亦由中秋燈籠換上聖誕禮物包

之前:

之後:

咁細件既裝飾有齊咁多野, 每當我整整下notes望到佢我都好歡樂!

自10月開始, 又獨自搬了出來

有很多的筆記要趕好

我需要一個絕對寧靜的工作室閉關之用

成個月無返過大埔老家

爸爸一見到我就話, 你做野一定好辛苦喇, 眼圈咁深

沒辦法哩, 每當一投入做一件事個腦就唔識得停

對自己功課要求實在非常非常高!

四處見到自己既相

雜誌, 易拉架, visualizer....

同事們幫左我好多

其實我未係好習慣, 一向怕羞嘛我

個日我一出"車立", 被個易拉架嚇退左半步

天氣轉涼了

呢兩日走在街上已經有一點點聖誕的感覺

今年冬天, 最期待的是<<Avatar阿凡達>>

12月18日上畫呢

唔知今次睇唔睇到....

近來上左好多大片都無睇過

有時要搵個口味接近既人陪睇戲都唔係易架

我又未學到好似呀大埔之友所言

"睇戲係一個人既娛樂"

然後可以咁大無畏自己走入戲院....

之前睇Tavi Gevinson個blog見到好可愛既蝴蝶頭飾

終於送到黎喇~ 其中一個我會送畀我既朋友

急不及待已經係屋企拆晒d蝴蝶出黎玩

呢一隻蝴蝶是我的

構成左以下一個唔係好協調既畫面....

或者我個人就係咁怪

既鍾意好浪漫好靚既野

亦都好鍾意我部latitude 4300

曾經有個朋友都發現過我呢個咁混合既特徵

話我這怪胎極度理性又極度感性

去左廸士尼稀釋世界

d鬼屋並唔恐怖, 但每間玩完既感覺都幾開心

同行既嘩鬼反而恐怖d

我地幾個睇廵遊嘈到丫....

個個巡遊既舞蹈員都同我地揮手

有個姐姐仲走過黎摸我塊面....

呢張係我幫冰冰同sally影既合照

紅圈中就係冰冰個頭喇

睇煙花

最有趣既的確係, 眼前一片既相機海

由於全部人無帶相機既關係

有靚景都影唔到靚相呀~!

跟住個日周同學同我講左佢身世既秘密

諗起都笑爆嘴XD

世界, 並唔係我心目中咁複雜, 咁深刻

我以後以後也不會相信甚麼虛情假義

誰也好, 請不要傷害我

跟一個人維持了很長的關係, 說到底, 和我的好洗好用還是有關吧

而所謂的愛情感覺, 其實找個夠漂亮的就會有

現實既法則真的很簡單很膚淺, 不要相信虛無飄渺的那一套

我從來就像一隻牛

你會怕隻牛罷工

但你唔會想帶隻牛出去玩

你唔會用心去感受呢隻牛既感受

可我, 係一隻會流淚既牛

我之所以好洗好用

並唔係因為我有過人之處

我只是, 對人對事都曾經投放過很多的感情

在我手頭上的, 從來都不是"工作", 而是"使命"

把自己的心也挖了出來, 夠痛了嗎?

收手了吧

既是牛, 就工作吧

從小就讀莊子, 我讀成了那麼唯心的思想

現在嘛

唯物論才能幫到我

悲喜也不過是人體內分泌所造

買些禮物去刺激自己, 可能會有"快樂"的感覺

到最後, 都係去左海濱公園

終於實現左掛一排燈籠既願望

我幫排燈籠影左好多相

不過有時月亮畀d樹葉遮住

唔係張張相都可以見到燈籠同月亮合照>"<

將特大螢光棒放落個星星煙花袋裡面

就變左做夜光袋喇!

聽日繼續努力!!